Akte 18

₁Tëm noo, is Phaulus aus Ateenas kang un is pis Korint kang. ₂Hot too en yut ketrof, Akila kenënt, woo aus te prowins Pontus waar. Eyer waar fer khortsem fon Itaalia khom mit sayn fraa Prisila, wayl te Kayser Klautius kexikt hat tas ale yute aus Room këngte. Phaulus is se pesuuche kang ₃un is too keplip fer mit tëne se xafe, wayl Phaulus sayn profisioon waar ti selwich wii tëne sayn, was mënt, parake mache. ₄Un yeete samstach hot eyer in te sinakook kexproch am unterichte fer ti yute un fer tii woo khee yute waare.

₅Wan Silas un Timoteo aan khom sin fon te prowins Masetoonia, hot Phaulus aankefang sayn kans tsayt aanwëne fer ti mensaaj aan saan. Eyer hot fersichert fer ti yute tas Yeesus te Kristus is. ₆Awer, phaar fon tëne sin keeche Phaulus keplip un hon em ferxënt. Tan, in en protëst sinaal, hot eyer te xtaap fon sayn tsaych ap kexiteelt un saat:

— Wën teyer aych ferleere tuut, sayt teyer selepst xult. Ti responsapiliteet wërt net mayn sin. Fon yets aan foran saan ich ti mensaaj aan fer tii woo khee yute sin.

₇Tan is eyer fort kang fon te sinakook un is woone kang in Tisius Justus sayn haus, en man woo khe yut waar, woo Hërkot atoreyert hat. ₈Krispo, woo xëf fon te sinakook waar, hot aach an te Hër Yeesus keklaapt, un ti kanse layt fon tëm sayn haus tepay. Fiile layt fon te xtat Korint hon ti mensaaj aan keheyert, hon keklaapt un sin ketaaft kep.

₉Een nacht, hot Phaulus en wisioon kehat, un too saat tëm te Hër:

— Prauchst khee pang hon, xprech wayter un playp net ruych, ₁₀wayl ich sin mit tich. Nimant khan tich xaate tuun, wayl fiil layt fon tee xtat sin mayn.

₁₁Un Phaulus is een un halep yoer too keplip, em Hërkot sayn wort am unterichte fer tas folek.

₁₂Wan Kaalio kowerneyer kep is fon te prowins Akaya, hon ti yute sich kesamelt keeche Phaulus. Tii hon em kefang, un hon em uf es kericht kenom ₁₃un saate fer te kowerneyer:

— Tee man wil tas folek iwer reete fer Hërkot atoreere in en aart woo keeche unser kesets is.

₁₄Wan Phaulus xpreche wolt, saat Kaalio fer ti yute:

— Yute, wën tas en xweere feeler ore en kroose telikt weyer, weyer es mayn flicht tas ich ketult het fer aych aan se heere. ₁₅Awer, wii tas sich ploos halt um wërter, naame un ayer aychne kesets, tan resolweyert tas teyer selepst. Ich xpiile net te richter in tëne kexichte.

₁₆Un hot se raus kexikt fon sayne kericht. ₁₇Tan hon se Sostenes kefang, te xëf fon te sinakook, un hon em ferhau foer em kericht. Awer, Kaalio hot sich net temit kekhimert.

₁₈Phaulus is fiil taache keplip mit te kriste in Korint. Tëm noo hot eyer apxiit kemach un is uf en poot kextii noo te prowins Siiria, mit Prisila un Akila. Eep eyer inkextii is in Senkrëya, hot eyer ti hoer khaal ap xnayte kelos als sinal tas eyer en ferxprechung inkehal hat mit Hërkot. ₁₉Tii sin in te xtat Ëfesus aan khom, un Prisila un Akila sin too keplip. Phaulus is in ti sinakook kang un hot mit te yute kexproch. ₂₀Tan hon se ferlangt eyer solt mee tsayt mit tëne playwe, awer eyer wolt net. ₂₁Un, wan eyer fort kang is, saat er:

— Ich khome tsurik, wën Hërkot wil.

Tan is Phaulus inkextii uf en poot un apkefaar fon Ëfesus. ₂₂Wan eyer aus kextii is in Sesarëya, is eyer klaych noo Yeruusalëm kang. Too hot eyer en khorts pesuuch kemach fer ti khërich un, tëm noo, is eyer wayter kereest noo Antiokia fon Siiria.

₂₃Noo en khorts tsayt in Antiokia, is eyer fort kang. Is torich ti prowins Kalasia un te tistrikt Friijia kang, fon een plats tsum aner am keen, te kriste sayne klaawe am xtërkere.

₂₄En yut Apolo kenënt, kepoer in ti xtat Alexantria, waar aan khom in Ëfesus. Eyer hot kans kuut kexproch un hot en tiife khëntnise kehat fon te Hayliche Xrifte. ₂₅Waar aach kelërnt im “Hër sayne Weech”, hot kexproch mit kroose muut, un sayn untericht iwer Yeesus waar richtich; awer hot ploos Yohan sayne taaf kekhënt. ₂₆Eyer hot aankefang se xpreche mit koraaj in te sinakook. Prisilia un sayne man Akila hon em keheyert xpreche; tan hon se em mit hëm kenom un hon tëm peser em “Hër sayne Weech” auskeleet. ₂₇Wan Apolo resolweyert hot noo te prowins Akaia keen, hon ti kriste fon Ëfesus iim animeyert un hon priife kexrip fer ti priiter fon tort, am ferlange tas se em kuut uf nëme solte. Wan eyer tort aankhom is, hot eyer tëne fiil keholef, tii woo torich Hërkot sayne knaate keklaapt hate. ₂₈Wayl Apolo hot, mit xtarke arkumënte, te yute imer ap kewun in puplike tiskusioone, am pewayse torich ti Hayliche Xrifte tas Yeesus te Kristus is.