Maraco 9

₁Zesopa pouaza queriqquimanarrarideniza denima uati tarrari: —Ouape parrissehera tiadeniza uati onarraro. Arriza tidomodeni uarraro motadenipe tizoqquemane-rreraccazama Deocca cacauehe dacorehema ccarronani qqui tiquenanitoui −naui nade.

₂Nazapa Zeso narraro uima uati taui nattini uada 6 naza ssonouarri toqquemorazapa Pedoro, Tiaco, Zouao quenarraridenira iaqquemorabaqquirrari. Rraui torremorazapa ssono tetepiuarri bacco tomoremanarrari. Nauiza qqui toquenanarra Zeso pano tozibehirraro. ₃Pocca etero naqui amazati tozibehirraro, mopo tarraro. Narraro moponipe madirra ssamoqquiri naui. Madirra iape etero siqui siqui ineraha irrine narrarossa naniuarrine parrire-rrerani. ₄Nazapa qqui toquenanarra Eria, Moize tezerre Zesoza auatomanaza uimahaha canarrari. Pouadenipa maittaccazamacca Deo Atti cacomeraqquiri narrarideni Zesouarri auatome-manarrari.

_5-6Nazapa Pedorodeni cappinemanarrari. Naraha Pedoro poua bodiza: —Nerrecora uati onaniuarrine? −nanarra pouama poua atti Zesoza: —Ia Maride, iape arriza iquerreneza bica tani. Ticcadeni oza rrorrorede 3 canehe icanauatona. Nezape arrirraro tiaza, Moizeza, Eriaza cananiuarrine −naui nade Pedoro. ₇Naraha amazati pouadeni tetepiuarri esseni ccaronarraro. Ccaronezape pouadeniza irriuarranirraro. Nazapa naui esseni bodiza atti qquenarraro: —Arrarraripa occa Erredeni. Pouaza ouati uana tarraro. Poua atti timittemananissa tarri −naui nade Deo. ₈Nanarra qqui toquenaraha Zesoza madirra ouahapa domo ua-rraraui. Poua motta ua canarrari.

₉Nazapa ssonouarri rrauizippaniza Zeso pouadeniza uati tarrari: —Arri ssono tetepiza qqui tiquenarrarocca uimape tecomemanaccana. Ouape Madirra Bedi orrarrarope niza ozoqqueni nattini onauatonizana narraro uima tecomeremananiuarrine bica tani −naui nade Zeso. ₁₀Poua atti nama nazapa madirra ouahaza uati toquena-rrararaha pouadenira uimahaha canarrari: —Nerreco uimara uati tarrari? Poua attipa: “Onauatoninitoui” naua −quenaui nade.

₁₁Nazapa Zesoza uati toquenarrari: —Nerrecotoui zodeodenicca marinarra maridedeni attipa: “Cristo-Mesia ccarrona-rraraccazama Deo Atti cacomerabote Eriana taide ccanipouitoui” quequenanarrari? −quenaui nade poua uatimadedeni.

₁₂Nama quenazapa manaco Zeso pouadeniza: —Parrissa, taidepa Eria ccanipouitoui, uima bazima icattemarizaponiuarrine. Naraha oua Madirra Bedi otauimaripe Deorrine Poua Atti cacomeraqquiri narrarideni dozo iquenaporraro. Narraroa arri nanarrizo orrezape ocasserani ouanitoui. Madirra naco oua rrarra icanemananitoui −naui nade Zeso. ₁₃—Naraha ouattipe: Eriapa ccanipode, onarraro. Arra Eria zoqquerrari ccanipo-rrararaha madirra ouaha pina pouassa narrari ccarronaza uima icattemarizapode. Naraha nacasserehe pouaza inanemanade. Narraro uima pouaza torrarrarope maittaccazama Deo Atti dozo naporrarossa narraro −naui nade Zeso.

₁₄Nazapa Zeso, Zouao, Tiaco, Pedoro quenarrarideni Zeso poua uatimade mota madimanauiuarri bacco zippanimanabote naza qqui toquenarrari. Pouadeni tesse madimanauiza madirra uapi taha toqueriqqui narrari. Nauizapa zodeodenicca marinarra maridedeni Zesocca madirra tezerre arrauarri uati arrauarri uati quenarrari. ₁₅Naraha Zeso bacco naniui qqui toquenaza uatizemanarrari: —A, Zeso bacco naniui −quenazapa pouaza nirra quenauiuarrine pouauarri domo toqquerrizarrari. ₁₆Nazapa Zeso pouadeniza uati tarrari: —Nirra, nerrecotoui arriuarri uati arriuarri uati tiquenarraronerre? −naui nade. ₁₇Nauiza madirra orraria Zesoza uati tarrari: —Oua Maride, occa erredeni tiaza ouaccarronarraripa. Poua bodiza tocorime madizarrari. Narrarirrine atti cappirarrari. ₁₈Poua dama inaza rrazirema cco inacossazapa namiza edima boua nazapa poua arrari ssaborrene tocca tocca narrari, ino ccado-do-do narrari, assirema ccara-ra ccara-ra narrari. Occa erredeni nama nama naza tetimadedeniza uati onarraropa: “Occa erredeni poua bodicca zosse tininemanarro” onaraha ssamoqquiri naparra −naui nade imehi atti. ₁₉Nazapa Zesoa: —Rraho, madirra bazima Deoza rrehe tiquenanissa terrerani. Tiadeni mari mari ohocanabaqqui naraha nerrecoma neza ticauatterapazerre? Ticcadeni rrehenirri parrirenissa terrerezape ouaza ocassera teraha nema nehe onauana-zanaponiuarrinequi? −nanarra: —Rrari, ticca erredeni ouaza teccarronarro! −naui nade Zeso.

₂₀Nama nazapa pouauarri erredeni eccarronemanarrari. Naraha tocorime Zeso qqui tazapa erredeni quiza inanarrari. Namiza touedimarrari. Deue narizazapa arrari ssaborrene toccarrari. ₂₁Nazapa coma tarrari imehiza Zeso uati tarrari: —Poua coma tauicca abazico nerrecoma canaui? −narrari. Naraha imehi attipa: —Bazira tazamade −naui nade. ₂₂—Uarrirriraza quiza inanazapa zippoza naco ihinassonizana narrari. Passoza naco ihinassonippa nanarra narrari, inanazoqqueuiuarrine. Nezape Zeso tiana nauato tinanitide. Iaza teti uana tarri, ia acco ticanabaqquiniuarrine −naui nade Zesoza. ₂₃Naraha Zesopa: —Rraho, tettipe ouaza: “Tiana nauato tinanitide” tarraro nema terrerarri. Madirrapa poua bodi Deoza rrehe nauissa tazapa nauato tarrari: “Deopa uima bazima inananiuarrine parrireui” narrari −naui nade Zeso. ₂₄Nazapa imehia atti moui taza uati tarrari: —Rrehe, Deopa parrireui! onarraro. Naraha obodi acco ticanarri, occa rrehenirri todacorani naniuarrine −naui nade.

₂₅Nazapa Zeso qqui tanarra madirra pouaza queriqquirronaui touapiui naui qqui tazapa tocorime zosse ininerrari. Poua attipa: —Tocorime, touaribo tonadidide, touebeno totonassamode, tia zosse onarraro. Erredeni tineborro! Tiqquenezape tiqquezimanipoma-rrerarri, onarraro! −naui nade Zeso. ₂₆Nazapa tocorime rroua narrari. Pouarrine erredeni uatiacossaza dari-ri-ri nazapa qquenarrari. Nazapa erredeni pina uatiarrarissa naha ponarrari. Nama nazapa: —Uatiaui −quenarrari nade. ₂₇Naraha Zeso erredeni zepeza dama inazapa nomi taha inatema narrari.

₂₈Naza zotode Zeso ozauarri toqquezimanizapa poua uatimadedeni motaha: —Nerrecotoui iaha arrarrari erredeni bodicca zosse inineuiuarrine iparrire-rrerapa? −quenarrari. ₂₉Nazapa Zeso attia: —Nama nauicca zosse tininemanauiuarrinepa Deoza uati tiquenezana toqquena taui −naui nade Zeso.

₃₀Nazama nauiza nebomanazapa rraui torranirrari. Zama arobeni Carireauarri rraui torreqquimarrari. Naraha Zesopa poua toqqueqquimaui madirra nauatoqquiri nauiuarrine touini narraraza poua cacomaza toqqueqquimarrari. ₃₁Arra Zeso nama narraripa poua uatimadedeni pouadenira maride zepe irriuiuarrine. Poua attipa: —Ouape Madirra Bedi orrarraroa niza zotode madirra orraria oua ccaccorazapa madirra zepedeniza orrezape oua inanazoqque-mananitoui. Oua ppa izemaneraha uada pama torrari nezape Abi Deo oua nauatoniuitoui −naui nade Zeso.

₃₂Naraha pouadenipa pocca marinarra mittemanauissa tarrararrari. —Nerrecoma tarraro? −quenauitouiraha cappinemanazapa Zesoza uati toquena-rrararrari.

_33-34Nazapa Zeso poua uatimadedeni tezerre oza panani Capenaouarricca rraui rraui torraniza Zeso uatimade pouadenira uimahaha tocananirrari: —Arri ia bazimape nerrecorrarina deni torrarrari? −tanimanarrari. Ozaza bacco tanimanazapa rraui torrezimanirrari. Nazapa Zeso poua uatimadedeni uati icanabaqquirrari: —Nerreco uimara rrauiza uimahaha ticananirraronerre? −naui nade. Naraha pouadeni bodipa: —Zeso icca uimaza nacassera tauitide −quenazapa ecomeremana-rrerani. Tocadidire narrari. ₃₅Nazapa Zeso uittariza poua uatimade 12 quenarrarideni ua inabaqquizapa pouadeniza uati tarrari. Poua attipa: —Madirrapa: “Ouana deni orrani” narraripa Deoza bica tarraraui. Madirrapa: “Ouape arrimani orrani” narrarina Deoza bica tarrari. Narraripa madirra bazimaza acco canade damera tazapa narrarina Deoza bica tarrari. Arri pocca uima bica tezape pocca deni torrehe parrissehecca auato tarraroparri −naui nade Zeso.

₃₆Erredeni ua inaza poua uatimadedeni rrassi nauarraniui nocconiza inaua narrari. Nazapa idi, zorro irrizaza poua uatimadedeni mari icanabaqquirrari. ₃₇Poua attipa: —Arrarrari erredenissa narrariza tetideni uanaqquiri nezape ouaza naqui tetideni uanaqquiri narraro. Ouaza tetideni uanaqquiri nezape oua Cazossede Abi Deoza naqui tetideni uanaqquiri narraro −naui nade Zeso.

₃₈Nazapa Zouao Zesoza uati tarrari: —Oua Maride, madirra ouaha tia oni ua naza madirra bodicca tocorime zosse inineui qqui inade. Naraha pouapa iaza ccariza-rraraza pouaza: “Peperri tarri. Poni” inade −naui nade Zouao. ₃₉Naraha Zeso attipa: —Pouaza poni tiquenerrerarri. Madirra oua oni ua naza canauatoriri canazapa niza zotode ouaza atti uaidira tarrarauitoui. ₄₀Madirra nama narraripa iaza boque tarraraza ia acco canade torrarrari −naui nade Zeso. ₄₁—Parrissehera tiadeniza uati onarraro: Arri ouaza tiquerrenezape madirradenipa: “Rrehe, pouadenipa Cristo-Mesiacca madirra, pouadeniza accora onana” quenaza tiadeniza da iquenaza bica tani. Passo ze tiquenaniuarrine da icanemaneza naqui manaco nizaranibote Deo pocca biquehe pouadeniza inananitoui −naui nade Zeso.

₄₂Zesopa denima uati uati tarrari: —Nazama madirra orrariarrine ouaza rrehe quenarrari uimasiri inanemanezape pouaza narrizoue oppina tanicca ssonarinitoui. Erredeni ouaza rrehe quenarrarideni naco madirra uimasiri mamariderrine uimasiri tocauatterazapa arra uimasiri mamaride pouaza narrizoue oppina tanicca ssonarinitoui. Pina arrirraro uimassa narraro: Siba ccanarrabote poua mattoza ssoque zanaza ueni imehiuarri rre tauiuarrine cco tozippazapa oppina taraha narrizoue denima oppina tanicca pouaza ssonarinitoui.

_43-44—Nazama uimasiri tinana-rreraniuarrinepe tibodi daco tirrireza poni tarri. Poni terrerezape uima oppina tanicca tiaza ssonarinitoui. Pina tizepeza uimasiri tinanabote neraha daco tirrireza poni tarri. Nema tezape pina tizepe ca ticarrizarrarossa narraro. Tizepe carrarie amossi caneraha Deocca cacaueheza timadizape tetizenitoui. Naraha uimasiriza damera tinezape pina tizepe capamehe ticarrirrarossa neraha rrororoni rriquerreraniuarri ticcanitoui. Narraro rrororonipe ouiuira tani.

_45-46—Nazama uimasiri carri taniuarri ticcaniuarrine naqui touini teraha poni tarri. Nema tezape pina temori ca ticarrizarrarossa narraro. Temori carrariraha Deocca cacaueheza timadizape tetizenitoui. Naraha uimasiriza damera tinezape pina temori capamehe ticarrirrarossa neraha rrororoni rriquerreraniuarri tia coro tozimauitoui.

₄₇—Nazama tinoccoza naqui touini tanicca qqui tineza uimasiri tinananiuarrine touini teraha daco tirrireza poni tarri. Nema tezape pina tinocco uari, rroca, rreo, coro tinarrarossa narraro. Tinocco orrariraha Deocca cacaueheza timadizape tetizenitoui. Neraha uimasiriza damera tinezape pina tinocco pamehe ticarrirrarossa neraha rrororoni rriquerreraniuarri tia coro tozimauitoui. ₄₈Naniuarri ocasserani tezanaponitoui. Timeqquene ssari-ri cazanaponitoui. Rrororoni ouiuira taniccaza time ca zanaponitoui.

₄₉—Arri tiadeni bazima Deorrine tibodideni uisso taniuarrinepe pina sahorrine bani rrazi-rrararrarissa nanitoui. Pina zippo rrororonirrine bani cazapa rrazi-rrararrarissa nauitoui. ₅₀Sahope bica tani. Baniza saho uizo inezape rrazi-rraraui. Naraha saho arriboni rriquezape tomarridera tani, icca bani naco touaidira taui. Arribo tapomaniuarrine ssamo tani. Tiadeniza ouatti pina sahossa onanarraro. Ouatti ticarrimanana, uimasiri tinanemana-rreraniuarrine, madirra ouahadeni tinanabicabaqqui-manauiuarrine. Titessedeni tezerre ticarronerara canarri, onarraro −naui nade Zeso.