Uizarra cacauade uaidiraqquiri narraridenicca uima
1Nazapa Zeso pocca marinarra arrirraro namiza imadinicca uima tazarrani mari icanabaqquirrari: —Madirrapa pocca uizarraza ppa taui uva pouara ppa inarrari. Nezape uizarra inidi siba ua inauarranirraro. Uva bono ttai naza pperrene torrauiuarrine naqui sibaza odi inauatorraro. Uizarra cacauade uittariuiuarrine siba ua tamaroni naqui ua inamarorraro. Narraro bazima rriquezape uizarra rrinede pocca uizarra ecauemananiuarrine madirratoui qqui narizarrari, naui pocca uizarraza tarabaia quenauiuarrine, ppa taui uva ecauemanauiuarrine. Uva bono rradazapa motapa uizarra rrinedeza torrauiuarrine. Motapa uizarra cacauadedeni pouadeniza torrauiuarrine. Nazapa pocca uizarra ecauemananiuarrine madirra qqui inabaqquizapa pocca uizarra pouadeniza ineborraro. Nazapa rrinede zama uarri taniuarri toccarrari. 2Uva bono rradauicca abazico bacco tazapa uizarra rrinede uarri taniza madiraha pocca zozosse orraria pocca uizarrauarri zosse inanirrari, uva bonotoui uizarra cacauadedeniza uati tauiuarrine. 3Naraha pocca zozosse uizarrauarri bacco nanizapa uizarra cacauadedeni dama iquenaza idaqquimanarrari. Uva bono rriraha zosse inanimanarrari. 4Nazapa uizarra rrinede pocca zozosse ouaha zosse inanirrari. Uizarra cacauadedeniuarri bacco naniraha narrari naco inarrizomanaza tati biquerarrari. Itamassomanaza uva bono rriraha zosse inanimanarrari. 5Nazapa pocca zozosse ouaha zosse inanirrari. Naraha narraripa inanazoqque-manarrari. Zotode naco pocca zozosse tabaqqui zosse inanibaqquiui uapi taraha motadenipa itauaquemanarrari. Motadenipa inanazoqque-rizemanarrari.
6—Nazapa pouaza orraria madiccaui, narraripa uizarra rrinede poua pocca erredeni. Narrarizapa uati uana tarrari. Poua bodipa: “Occa erredenizana cappinemanauitoui” narrari. Nazapa pocca uizarra cacauadedeniza pocca erredeni zosse inanirrari. 7Naraha uizarrauarri bacco nanizapa uizarra cacauadedeni pouadenira uati tocanirerrari: “Arrarraripa uizarra rrinede bedi. Nizaranibote imehi zoqqueza uizarrape bediza poua zepepero torranitoui. Rrari, inanazoqquena, uizarrape icca torraniuarrine” quenarrari. 8Nama quenazapa uizarra rrinede bedi dama iquenaza inanazoqque-manazapa uizarra ideniuarri coro iquenarrari −naui nade Zeso.
9Nazapa Zeso pouaza queriqquimanarrarideniza uati tarrari: —Rrari, tibodideni uatorri. Uizarra rrinede pouadeniza nerrecoma napazarra? Pouapa bacco naniza uizarra cacauadedeni inarricazapa uizarrape madirra ouahadenizana da inanitoui −naui nade Zeso.
10Nazapa Zeso poua tauimari pouadeniza auato taniuarrine Deo Atti dozo nanicca uati tarrari: —Tiadenipe Deo Atti dozo nanicca ua ua titiquena neraha siba uauattarro torrarraro tauimarini tetideni rrimemanarraroqui? Uimape arrima narraro:
“Oza sibaza icanauatomananiuarrinepe nanauatodedenipa siba orrariepe ettarromanani nade.
Naraha zotodepe narraro sibana oza daco carriraniuarrine torrarraro.
11Arri siba uauattarro torrarrarope ia Zozossede Deorrine deni torrarraro. Narraro uimarrine Deoza etizerraro”
nani Deo Atti dozo nanicca
−naui nade Zeso. 12Nazapa dada toqquimade taminedeni, zodeodenicca marinarra maridedeni quenaza Zesocca marinarra mittemanazapa bodideni nauatoqquiri narrari: —Zesopa icca uima uati uati tarrari, iape poua ettarrorrarirrine −quenaui nade. Nazapa Zesoza boquemanaza: —Zeso tozepe inanana −quenaraha madirra noppinedeni cappinemanazapa paparra quenaza rraui torranirrari.
—Rromanodenicca tamineza icca ziniro mota da inaniuarrine bica taqui? −quenarrari
13Nazapa zodeodenicca taminedenipa marinarra parizeoza rrehe quenarrarideni pama, tamine Erodicca madirra pama quenaha zosse inarronabaqqui-manarrari, Zesocca uima inassamomaneza pouaza uima inassonarimananiuarrine. 14Bacco narronemanazapa uati toquenarrari: —Mamaride, ticca uima iaza auato tani. Parrissehera uati uati tinarraro. Madirra attideni noppine ticappine-rrerezape ticca uima onihi torra-rrerarraro. Madirra deni torrarrari, madirra zepe sse tarrari, madirra arramani torrarrari tezerrepa tiaza narrarissa caniqquimerarrari. Parrissehera Deocca marinarraza madirra madimanauissa tauiuarrine mari mari titicanabaqqui narrari −quenaui nade. —Nazama iape rromanodenicca tamine deni torrauicca pocca zossenirriza icca ziniro mota pouaza da inaniuarrine bica taqui? Bica terrererane? Moizecca marinarraza oppina taqui? Oppinera terane? Tetti nerrecoma tani? Paca inaniuarrinequi? Paca inerreraniuarrinerane? −quenaui nade. 15Zesoza attideni bica taza uati uati toquenaraha poccadeni maizehe pouaza auato teza pouadeniza uati tarrari: —Nerrecotoui occa uima tossamoniuarrine ouaza uati tiquenarraro? Rrari, ouaza ziniro denario zorro ticanarronemanarri, qqui ocanana −naui nade Zeso. 16Zorro icanarronemanezape Zeso attia: —Rrari, arrirraro ccararazape nerrecorrari corimena anirraro? Nerrecorrari oni dozo narraro? −naui nade Zeso.
Nazapa pouaza ecomeremanarraro: —Rromanodenicca taminederra −quenaui nade. 17Nazapa pouadeniza Zeso attipa: —Rromanodenicca tamine pocca zinirope pouaza da tinanimanarri. Naraha Deocca tiquerrenezape Poua nacassa tauiccara Pouaza da tiquenarri −naui nade Zeso.
Nazapa —Zesocca uima tossamona −quenarrarideni uarro quenaza attidenipa: —A, icca uima ecomeraniuarrine nauato tarrariua −quenaui nade.
Niza rriquemanarrarideni nauatonimanazapa carri carri cana-rrarauitoui
18Nazapa Izarraeo potemaui zodeodeni mota marinarra sadoseoza rrehe quenarrarideni Zesouarri bacco quenarrari. Poccadeni marinarrape: —Izoqquezape inauatoniniuarrine nouerani −quequenanarrari. —Narraro uimaza Zeso atti irrine tossamoza inanarrizona −quenaza Zesoza narraro uima uati toquenarrari: 19—Mamaride, Moizecca marinarrazape arrima nani: “Maqquiderrepa amonerre carriraha erredeni rriraha zoqquezapa pocca amonerrepe poua imecotena icarrina, naui erredeni carrizapa pocca ato zoqquerraricca erredenissa nauiuarrine” nade Deo Atti Moize dozo inarraro. 20Nazama tiaza uima arrima narraro uati inana. Arra pouadeni imecote pouadenira 7 quenaha madimanarrari. Taideccaha amonerre carriporrari, naraha bedi rriraha zoqquerrari. 21Zotodecca naco poua ouaha bedimeni icarriraha erredeni rriraha zoqquerrari. Zotodecca naco narraro amonerre icarriraha narrari naco erredeni rriraha zoqquerrari. 22Narraro uimape nema zanaporraro 7 quenaraha erredeni rriraha rricarrari. Narrarideni rricazapa poni naqui zoqquerraro. 23Nezape zama rriqueza madirra inauatonizape poua imecote 7 quenarraripa nerrecorrarina ponicca maqqui torrapazarra? Bazimapa poni icarriqquimanaporaha −quenaui nade.
24Naraha Zeso attipa: —Ticcadeni marinarrape zori tarraro. Deo Atti nauatoqquiri tiqueneraha parrissa tiquenanissa terrerarraro. Deo pocca dacorehema madirra inauatonibaqquiuiuarrine parrireui naco ssamoqquiri tiquenarraro. 25Rriquemanarrarideni nauatonimanazapa carri carri cana-rrarauitoui. Deouarri madimanazapa pina Deocca zozosse tabaqqui memeuarriccassa quenauitoui. Arra pouadenipa carri carri cana-rraraza madimanarrari.
26—Nazama Deorrine madirra nauatonimanauicca uimape Poua Atti cacomerabote Moize dozo inaporraro. Narraro Deo Atti dozo nani ua ua titiquena naraha narraro uimape tetideni rrimemanarraroqui? Arri aua dirri taniza Deopa Moizeza uati tarrari: “Ouape Deo, ticca idideni Abarahao, poua bedi Izaqui, poua bedi Zaca quenarraridenicca Deo orrani” naui nade. 27Arra Deo Atti nama nazapa Abarahaodeni nauatonimanaza madimana-zanapouicca uima auato tarraro. Deopa parra zoqquemanariui narraridenicca Deo rraraui. Deopa camittaqquiri narraridenicca Deo. Pouapa rridapana naco poccadeni Deo. Narraroa ticcadeni marinarraza: “Nauatonie nouerani” titiquena narrarope zori tarraro. Parrissa rrerani −naui nade Zeso.
Deocca zossenirri deni torranicca
28Zesopa sadoseodeni tezerre arrauarri uati arrauarri uati quenanarra zodeodenicca marinarra maride orrariaha Zeso pouadeniza ecomerani bica tani mittazapa poua naco Zesoza uati tarrari: —Rrari, Deocca zossenirri uapi teraha nerrecorraro zossenirrina pocca zossenirri bazimaza deni torrarraro? −naui nade. 29Nazapa pouaza Zeso uati tarrari: —Arri Deocca zossenirri deni torraniccape arrima narrarona parri:
“Izarraeo potemauideni, titauaribobo canarri. Ia Zozossede Deopa orrarirrari. Deo ouaha noueraui. 30Tiadeni Zozossede Deoza tetideni uanaqquiri narri. Tibodideni uatonissa teza, dacoco tirrireza Pouazara dameraqquiri tizanapomanezape Pouaza tetideni uanaqquiri naniuarrine.”
31Deocca zossenirri deni torranicca onihi pina taideccassa narraro. Deni torraniccape arrima narraro:
“Tinorideniccaza tetideni uanaqquiri narri. Pina tiadeniza tetideni uanaqquiri narrarossa narri.”
Narraro Deocca zossenirri pamehena deni toquerrenarraro. Pocca zossenirri onihipe narraro pamehessa nerrerarraro −naui nade Zeso.
32Nazapa Zesoza zodeodenicca marinarra maride attia: —Rrehe Mamaride, tettipe parrissa. Ia Zozossede Deopa orrariui. Ouaha nouerarrari. 33Nazama Deozara eti uanaqquiri naniuarrine. Ibodi uatonissa teza dacoco irrireza Pouazara dameraqquiri izanapozape Pouaza eti uanaqquiri naniuarrine. Inoriccaza naqui eti uanaqquiri naniuarrine pina arri iaza eti uanaqquiri narrarossa inaniuarrine. Narrarona denima bica tarraro. Arri icca bani bedi ono torrauiuarrine Deoza dada toqquimauarri da da ihinanarrari, icca danirri onihi naqui dada toqquimauarri ihinebo narrari bazimapa Deoza bica taraha arri touati uanehe pameheccaza deni toquerrena-rrerani −naui nade zodeodenicca marinarra maride atti.
34Pocca cacomeranirri bica tanicca Zeso mittazapa: —Rrehe, Deocca cacaueheza tirraniuarrine tiparrirebote nani −naui nade Zeso. Zesopa ecomeranissa zanapozapa uima onihi pouaza uati toquenauiuarrine bazima cappinemanarrari.
—Cristo-Mesiapa nerrecorrari potemaui tiquenarraro? −narrari Zeso
35Nazapa Deoza dada toqquimauarri Zeso mari icanabaqquizapa madirra ecomeremananiuarrine uati tarrari: —Nerrecotoui zodeodenicca marinarra maridedeni attidenipa: “Cristo-Mesiapa Dabi Potemaui” quequenanarrari? 36Naraha tamine Dabipa maittaccazama madiza Deo Corimerrine poua tezerremacca uima uati tazapa poua attipa:
“Ia Zozossede Deopa oua Zozossede Mesiaza uati tarrari: ‘Ouinori nauatoniuarri tittarirri. Otezerrepe touatti dacorarraro ticarrirri’ narrari. ‘Nizaranibote tia uauadidedenipa arramani onanabaqquiuitoui. Poccadeni dacorehepe onarricanitoui’ napoui nade Deo.”
37Naraha madirra attidenipa: “Cristo-Mesiapa tamine Dabi Potemaui” quequenanazapa nerrecotoui Dabipa poua potemauizaraha: “Oua Zozossede” naporraritta? −naui nade Zeso.
Nauiza Zeso atti mittade madirra uapi taha queriqquimanarrari. Pocca marinarra mittemanaza uatizemanarrari.
—Parri, tiadenipe pina zodeodenicca marinarra maridedenicca madiessa tiquenerrerarri −narrari Zeso
38Zesopa madirra mari icanabaqquiza uima arrima narraro uati tarrari: —Parri, tiadenipe! Pina zodeodenicca marinarra maridedenicca madiessa tiquenerrerarri. Pouadenipa etero arabo tarraroza oro tozimemanaza attidenipa: “Iape pina taminessa inani” quequenanarrari. Arri dadauarricca rrauiza rrauirizaza naco madirra pouadeniza: “Nirra, bica tinani? Tiape deni tirrani” quenauiuarrine touini quequenanarrari. 39Deo Atti mamariuarri rrassi tariuiuarrinepa deni toquerrenarraridenicca uiuittari touini quequenanarrari. Rripaqquie imeniza naqui deni toquerrenarraridenicca uiuittariza rrassi tariuiuarrine touini quequenanarrari. 40Nazama amonerre tobaccopero ponideni madimananiuarrineccaraha icamaizabaqqui-maneza pouadeniza totorra nezape ponidenicca oza naqui pouadeniza totocarrariza narraro. Neraha poccadeni uaidirehe auatora taniuarrinepe Deoza uati uati toquenazapa poccadeni uatinarra arabo tarraro, arra madirra pouadeniza: “A, Deoza dameraqquiri naui” quenauiuarrine. Pouadenipa Deo Attima mamaizemana nazapa niza Deocca narrizoue denima oppina tanicca pouadeniza ssonarinitoui −naui nade Zeso.
Amonerre tobaccopero ponicca ziniro Deoza da inanicca uima
41Nazapa Zeso Deoza dada toqquimauarri madiccarrari. Pouapa naui bodiza madirracca da naqquinarra ziniro cocoro toza cauittarini tazarranima uittarirrari. Madirra poccadeni ziniro coro coro icazemanani cattoma canarrari. Ziniro sseqquiri narrarideni uemani coro icazemanani qqui tarrari. 42Nezape naniza amonerre tobaccopero touati nauana tarraro ccarronarraro. Poni madiniuarrinecca ziniro bedeniraha ponicca danirrina capamehera cororo icazarraro. 43Nazama narraro qqui tazapa poua uatimadedeni ua inabaqquirrari: —Parrissehera tiadeniza uati onarraro: Arrirraro amonerre tobaccopero cappireraha touati nauana teraha ponicca danirri ziniro bedeniraha deni torrani. Pina Deoza denima da inarrarossa narraro. Madirra ouahadenipa poccadeni danirri toqueriqquini uapi teraha Deozape arrimani torrarrarossa narraro. 44Pouadenipa sseqquiri naza poccadeni ziniro mota arobeni da iqueneraha arrirraro amonerre tobaccoperope cappireraha nemanehe da inarraro. Touati nauana tani, poni madiniuarrineccaraha da inehe rricarraro −naui nade Zeso.
