Zeso poua uatimade amorideni ssaua inabaqquirrari
1Pascoacca rripaqquie torraniuarrine uada orrarie tossiuaueraha Zesopa poua tezerremacca uima nauato taporrari: arrirraro namiza madide nebouiuarrinecca uada bacco tabote nani. Arrirraro nami ineboza Imehiuarri torranipomauiuarrine. Zesopa pocca madirra arrirraro namiza madimanarrarideniza uati uana taha nama narronarraria poua zoqqueui bacco tarrariparrade.
2Zome irripaniuarrine inarroreraha taide uimasiri mamaride Tocorime-Taminerrine Simao Iscariote bedi Zoda bodi narrorarrari, Zeso tozepe inanauiuarrine. 3Zesopa Deo Pouauarri ccaronauicca nauato, Deouarri toccamacossani-uiuarrinecca nauato, Poua Imehicca deni torrehe carriui naco nauato tarrari. 4Narraro pocca deni torrehecca uima iattaniuarrine ia mari tocanabaqquirraride. Rripade iquerrenanerre Zeso totemazapa pocca etero uapiccape ssiti ineza touamori ssessera poua doroza ssoque inade. 5Nazapa basiaza passo sso izeza poua uatimadedeni ia emori ssaua tabaqquirraride. Nazapa poua dorocca etero ssoque nacossarraroza emori sse tabaqquirraride.
6Naraha Simao-Pedoro amori ssaua inauiuarrineraha: —Oua Zozossede ouamori ssaua taniuarrinequi? −nade. 7Naraha Zeso attia: —Arri rridapana temorideni ssaua onarizarrarocca uimape ssamo tineraha niza zotodena timittanitoui −nade. 8Naraha Pedoro attipa: —Ouape poni! Ouamori ssaua tarri onerrerani −nade. Naraha Zeso attipa: —Temori ssaua onerrerezape occa tirra-rreranitoui −nade. 9Naraha Simao-Pedoropa: —Oua Zozossede ouamoria orrari-rrerana, ozepe ssaua, otati ssaua tarri! −nade. 10Naraha Zesopa pouaza uati tade: —Rrapi izatipe uisso inarraro, ia ssaua inanipoma-rrerani. Naraha emorina ssaua ssaua ihimani naniuarrine −nade. —Tiadenipe tibodideni uissoqquiri neraha bazima rrerani −nade Zeso. 11Zesopa poua ccaccorade nauato taporra narrari. Narraria arra: —Bazima uissoqquiri tiquenerrerani −narrariparrade.
12Emori ssaua tabaqquia rricazapa pocca etero uezapomaza rrirripa uauanariza touittarinide. Nazapa iaza uati tade: —Arri temorideni ssaua onarizarrarocca uimape nauatoqquiri tiquenaqui? 13Tiadenipe ouaza uaua titiquena nanipe: “Ia Maride, ia Zozossede” titiquena narrarope parrissa. 14Nema onarraroa ouape tiadeni Zozossede, tiadeni Maride orreraha pina ticcadeni zozossessa oneza temorideni ssaua onarizarraro. Narrarope tiadeni naqui temorideni arriuarri ssaua arriuarri ssaua tatarizemana nana. 15Arrirraro marinarrape tiadeni mari ocanabaqquirraro. Pina arri orrinessa tinanemananiuarrine, onarraro. 16Rrehe, parrissehera tiadeniza uati onarraro: Madirra pocca zozossedenipa pouadeni zozossedeza deni toquerrena-rrararrari. Pouadenipa arramani toquerrenarrari. Madirra pocca zozosse tabaqqui naco pouadeni zossedeza deni toquerrena-rrararrari. Pouadenipa arramani toquerrenarrari. 17Nezape arrirraro uima timittemananissa teza nema tinanemanezape tetizemananitoui, onarraro.
18—Arrirraro uimape tiadeni bazimaza uati onerrerani. Ouape nauato onani. Arra ocatterriza-baqquirraripa occa toquerrenauitoui. Naraha pina Deo Atti dozo naporrarossa nehe torranitoui: “Ouazama rripa rripa narrarina ouaza uima inananitoui” naporraro Deo Atti dozo nanipe. 19Narraro uima ouaza torra-rreraccazama tiadeniza uati onaporraro. Niza narraro uima torrani qqui tiquenezape ouaza parrissa tiquenanitoui. Ouape oua −nade Zeso. (Poua atti nama nazapa: Ouape Deo, narrari.) 20—Parrissehera tiadeniza uati onarraro: Madirra occa zossenirriza rrauirizarrarideniza: “Rraui tirrezimarri” quenazapa pina ouaza: “Tiqquezimarri” quenarrarissa narrari. Madirra ouaza rrehe quenazapa oua cazosserrariza naco rrehe quenarrari −nade Zeso.
Zesopa poua Zoda eccorauiuarrinecca uima auato inanaporraro
21Zeso uima uati taha rricazapa bodi qquezarrari. Uima auato inananiuarrine uati tarrari: —Parrissehera tiadeniza uati onana: Arri tiadeni orrariapa oua ccaccorauitoui −nade.
22Nezape poua uatimadedeni iara qqui icanirere canade. —Nerrecorrariza Zeso atti nama narrari? −inade. 23Nazapa poua uatimade orraria Zeso pouaza uati uana tarraria poua uinoriza rriparraride. 24Nazapa Simao-Pedoro arra Zeso uinoriza uittarirrariza poua zepeza: —Nerrecorrariza atti nama narrari? uati ticanarro −nade. 25Nazapa arra Zeso uinoriza uittarirraripa Zesoza uarrira taza pouaza uati tade: —Nerrecorrari? −nade Zesoza. 26Naraha Zesoa: —Arra pao arobe bani pperreneza ouezippa pouaza da onana. “Narrariparraua” tiquenaniuarrine −nade. Nazapa pao arobe ezippa, Simao Iscariote bedi Zodaza da inade. 27Nazapa Zoda pao arobe idirra, poua bodiza Tocorime-Tamine rraro nade. Nazapa Zeso Zodaza uati tade: —Arri “uima onanana” tarrarope amazati tinanarri −nade.
28Naraha bazima rripade rrassi inarirrarope arra Zeso Zodaza uati tarrari imitteraha ibodi ssamoqquiri inade. —Nerrecotoui nama narrari Zesopa? −inade. 29Zodapa icca ziniro cacauaderra narrari. Naraha itesse mota attidenipa: —Rrehe, erreteuarrinecca mittade Zeso zosse inarrari uitide. Cappiremanarrarideniza da taniuarrine toccarrari uitide −quenade.
30Nazapa Zoda pao rripaha rricazapa zomeraha toccade.
Zesocca zossenirri zati
31Zoda toccaui nattipa Zeso uati tade: —Ouape Madirra Bedi orrarraroa rridapanana occa deni torrehe qqui tiquenanitoui. Deocca deni torrehe naqui ouazana auato tanitoui. 32Deocca deni torrehe ouaza auato tezape manaco Deo occa deni torrehe auato inananitoui. Narrarope bacco tabote nani. 33Occa erredenideni, rridapanape tiadeniza omadiniuarrine uada uapi terrerani. Oua noue orrirezape tiadenipe otoui qqui tarizemananitoui. Narrarope maitta taide zodeodenicca taminedeniza uati onarrarossa narraro tiadeniza uati onarraro. Oua occaniuarripe rraui tirraniuarrine ssamoqquiri tiquenani. 34Nazama arrirrarope occa zossenirri zati: Tiadenipe tetideni cauanerara canana. Pina arri oua tiadeniza ouati uana tarrarossa narraro tiadeni naqui ouaza parrissa quenarrarideniza tetideni uanaqquiri nana, onarraro. 35Parrissa tetideni cauanerara canezape ticcadeni uima arri occa madirra tiquerrenani madirra bazimaza auato taniuarrine −nade Zeso.
Pedoro poua namaizauicca uima Zeso auato inanaporraro
36Naraha Simao-Pedoropa Zesoza uati tade: —Ia Zozossede nerrecouarri ticcaniuarrine? −nade. Naraha Zeso Pedoroza uati tade: —Arri oua occaniuarripe rridapanape ouaza tiqquerreranitoui. Naraha zotodena omadiniuarri ticcanitoui –nade. 37Naraha Pedoropa Zesoza uati tapomade: —Ia Zozossede nerrecotoui rridapanape tiaza oqquerreraniuarrine? Naraha tissiuauaniuarrinepe ouana onarrorani, oua ouaccoraniuarrine −nade. 38Naraha Zeso Pedoroza uati tade: —Parrissa ossiuauaniuarrine tia teccorapazerre? Naraha ouape parrissehera tiaza uati onarraro: Niza zotodepe tacara uaua narraraccaza tia tinamaizanitoui. Ouaza: “Onocco rriza tani” tanitoui, “onocco rriza tani” tapomanitoui, “onocco rriza tani” tapomanitoui −nade Zeso Pedoroza.
