Hërkot un sayn folek
1Was ich saan is woerheet. Ich keheere tsu Kristus un liye net; wayl mayne kewise is fom Hayliche Kayst kontroleyert un tuut mich aach fersichere tas ich net liye. 2Ich xpiire en kroos traurichkheet un en phayn oone ën im hërts 3weche mayn folek, woo mayn folek un mayn pluut is! Weche tëm folek, teet ich selepst winxe ti ferfluuchung fon Hërkot kriin un ap ketrënt fon Kristus playwe. 4Tii sin tas folek woo Hërkot aus kesuucht hot; tee hot se sayn khiner kemach un hot sayn kloor mit tëne keteelt. Hërkot hot sayn alianse mit tëne kemach un hot tëne ti kesets kep, woo lërnt ti richtich aart fer se atoreere un ti ferxprechunge. 5Tii sin nookhomer fon te patriarke; un, als mënx, tuut Kristus tsu tëne sayn folek keheere. Tas Kristus, woo te Hërkot is woo uns al kowerneere tuut, kelopt kep fer imer! Aamen!
6Ich sin net am saan tas Hërkot sayn ferxprechung feel kang is. In te woerheet, net ti kanse israelite keheere tsum Hërkot sayn folek. 7Net ale nookhomer fom Aapraham sin Hërkot sayn khiner. Wayl, Hërkot saat fer Aapraham: “Torich Iisak kewe ich tich ti nookhomer woo ich tich ferxproch hon.” 8Tas petayt tas tii woo ti echte nookhomer fon Aapraham kerechent sin, sin tii woo kepoer kep sin als resultaat fon Hërkot sayn ferxprechung, un net tii woo torich te natierlich apxtamung kepoer kep sin. 9Also, wii Hërkot tas ferxproch hot, saat eyer fer Aapraham: “In te richtich tsayt khome ich tsurik, un Sara, tayn fraa, kriit en khint.”
10Un noch: Rebeka sayn tswaay khiner hate te selwiche fater, unser foerkhomer Iisak. 11-12Awer, tas eene fon te khiner raus kesuucht keept tëm noo Hërkot sayne plaan, hot te aychne Hërkot fer Rebeka kesaat: “Te elste kept tomineyert fom yingste.” Hot tas kesaat eep se uf ti welt khom sin un eep se etwas kemach hon, xlecht ore kuut. Soo khëne mer siin tas es tëm noo sayne plaan is tas Hërkot aussuucht tii woo eyer ruufe wil, oone rechne was se kemach hon. 13Wii ti Hayliche Xrifte saan: “Ich hon Yaakop aus kesuucht, awer hon Esau ap kextoost.”
14Was khëne meyer tan saan? Tas Hërkot unkerecht is? Uf khee aart! 15Wayl eyer saat fer Mooses: “Ich kewe mayn knaate fer weem ich wil; tuun taure weyer ich wil.” 16Soo tan, tas ales hot niks se tuun mit was ti mënxe wole ore mache, awer ploos fon Hërkot sayn paarmhërtsichkheet. 17Wayl, wii es in te Hayliche Xrifte kexrip xteet, saat Hërkot fer te kheenich fom Ejipt: “Waar kraat fer tas woo ich tich als kheenich hiin ketuun hon, fer mayn macht se tsayche un mache tas mayne naame pekhant keept uf te kans welt.” 18Soo tan, Hërkot is paarmhërtsich mit weem eyer wil un kept en hart hërts fer weem eyer wil.
Hërkot sayn wuut un sayn paarmhërtsichkheet
19Ëne fon aych wil mich saan: “Wën tas soo is, wii khan Hërkot xult an te layt fine? Weyer khan keeche Hërkot sayne wile keen?” 20Awer, weyer pist tuu, mayne froynt, fer mit Hërkot tiskutiire? Meech en let top khëne frooe fer weem iim kemach hot: “Warom host tuu mich soo kemach?” 21Noo ales, te man woo te top macht hot ti recht fer te let penutse wii eyer wil. Fom selwiche let khan eyer tswaay top mache: eene top fer en spesial penutsung un anere fer en keweenlich penutsung.
22Un es waar tas woo Hërkot kemach hot. Eyer wolt sayn wuut un sayn macht kans pekhant mache. Soo hot eyer mit ketult aus kehal tii woo kextrooft kewe miste un woo fernicht kewe teere. 23Eyer wolt aach tsayche wii kroos sayn kloor is, woo eyer iwer uns kexut hot, woo sin tii woo eyer ketauert hot un weem eyer xon prepareyert hat fer tii kloor se kriin. 24Wayl meyer sin tii woo Hërkot keruuf hot, net ploos ti woo yute sin, awer aach tii woo khee yute sin. 25Tas is was eyer saat im Puch fon Osëyas:
“Tii woo net mayn folek waare tuun ich ‘mayn Folek’ nëne.
Ti natsioon woo ich net keliipt hon nëne ich ‘mayn Peliipt’.
26Un uf em selwiche plats woo kesaat kep is: ‘Teyer sayt net mayn folek’,
too kewe se kenënt ‘ti khiner fom leewente Hërkot’.”
27Un Isaiias saat iwer Israël:
“Wën ach tas folek fon Israël in soo kroose numer is
wii ti sant khëner am rant fom meer,
ploos phaar fon tëne kewe keret.
28Wayl te Hër julkeyert klaych un uf een mool ti kans welt.”
29Wii te aychne Isaiias hat tefoer kesaat kehat:
Wën te Aler Mechtiche Hër uns net phaar nookhomer kelos het
weere meyer yets kraat soo wii ti xtat Sotoma,
weere meyer fernicht wii Komora.
Tas folek fon Israël un te ewankeelium
30Was wole meyer tan saan? Meyer saan tas: ti woo khee yute sin, woo net fersuucht hon aan kenom kewe fon Hërkot, sin torich em klaawe aan kenom kep. 31Awer tas israelite folek woo en kesets kesuucht hot fer aan kenom kewe fon Hërkot, hot net kefun was se am suuche waare. 32Un warom net? Wayl tii wolte aan kenom kewe torich sayn aktsioone un net torich sayne klaawe. Tii sin kextërtst am “xtërts xteen”, 33wii ti Hayliche Xrifte saan:
“Kukt! Ich tuun in Sion en xteen leye woo tii traan xtërtse tuun,
ti fels woo se fale macht.
Awer weyer an tëm klaawe tuut wërt sich net tesaponteere.”