Lukas 3

₁Waare xon fineftsen yoer woo Tipëërio te reemixe Khayser waar. In tee tsayt waar Ponsio Pilatos te kowerneyer fon Yutëya, Herootes hot ti Kalilëya rechiert, un sayne pruuter Filip hot Iturëya un Traconites rechiert, un Lisanias waar te kowerneyer fon Apileene. ₂Un Anaas un Kaifaas waare ti Hooche Priister. In tee tsayt is em Hërkot sayn mensaaj kep waar, im tesërt, fer Yohan, soon fon Sakariias. ₃Un Yohan is ti kans keechent fom Yortaan Flus torich kang, tii mensaaj am aan saan: — Royert aych fon ayre sinte un lost aych taafe, tan tuut Hërkot aych fertsaye. ₄Tas is paseyert soo wii te profët Isaiias es kexrip hat in sayn puuch:

₇Fiil layt sin sich trefe kang mit Yohan fer sich fon iim taafe lose. Tee saat fer se al:

— Kiftiche xlange nist! Weyer hot kesaat tas teyer fom xrekliche xtroof langst khomt woo Kot xike wërt? ₈Macht tings woo tsayche tas teyer aych keroyert hat fon ayre sinte. Un saat net ëne tsum anere: "Meyer sin Aapraham sayn nookhomer". Wayl ich fersichere aych tas sokaar fon tëne xteen Hërkot aach nookhomer fon Aapraham mache khan. ₉Un ti aks is xon aan kesetst kep fer ti peem an te wortsle ap hake. Yeete paam woo khee kuute fruchte protutseyert, kept ap kehakt un ins fayer keworef.

₁₀Tan, hot tas folek kefroot:

— Was sole meyer mache?

₁₁Eyer antwort tëne:

— Weyer tswaay mantle hot, kep een fer weem khëne hot; un weyer ese hot, sol es teele mit weem khëns hot.

₁₂Phaar xtayer kaseerer sin sich aach taafe lose khom un hon fer Yohan kefroot:

— Mayster, was sole meyer mache?

₁₃Yohan hot tëne keantwort:

— Hoolt net ap mee wii es recht is.

₁₄Phaar soltaate hon aach tëm kefroot:

— Un meyer, was sole mer mache?

Un Yohan saat tëne:

— Tuut nimant xlecht pehantle, kept khee falxe tsayer un sayt tsufriite mit ayre loon.

₁₅Em folek sayn hofnunge sin imer kreeser kep, un ti hon ketënkt tas filaycht Yohan te Mesias weyer. ₁₆Awer Yohan saat fer se al:

— Ich taafe aych mit waser; awer is yemant am khome woo mee importanter is wii ich, un ich sin es net weyert tëm sayn santaale uf pine. Tee taaft aych mit em Hayliche Kayst un mit fayer. ₁₇Mit te xip woo eyer in te hant hot, macht eyer te weets fom xtroo ausnaner. Tuut te weets in sayne xop uf heepe un tuut es xtroo ferprëne im fayer woo sich nii aus prënt.

₁₈Yohan hot uf fiile ferxiitne aarte ti kuute naychkheete pekhant kemach fer tas folek un hot aan kehal tas se sayn leewe ferënere solte. ₁₉Awer, hot keeche te kowerneyer Herootes kexproch, wayl tee sich mit Herotiias ferhayrat hot, fraa fon Herootes sayne pruuter. Un aach wayl Herootes fiil aner xlecht tings kemach hot. ₂₀Tan hot Herootes etwas noch xlechteres kemach: hot Yohan in ti katee kexikt.

₂₁Wan tas kanse folek ketaaft kep waar, is Yeesus aach ketaaft kep. Un, wan Yeesus am peete waar, hot te himel sich uf kemach, ₂₂un te Hayliche Kayst is runer khom, in form fon en taup, iwich Yeesus. Un fom himel is en xtim khom, woo saat:

— Tuu pist mayne liipe Soon un kepst mich fiil frayt.

₂₃Yeesus hot sayn aarwat aankefang wan eyer unkefeyer traysich yoer alt waar. Er waar, soo wii se ketënkt hon, Yoosef sayne soon, woo Elii sayne soon waar, ₂₄soon fon Matate, soon fon Lewii, soon fon Mëlki, soon fon Yanay, soon fon Yoosef, ₂₅soon fon Matatias, soon fon Amoos, soon fon Naum, soon fon Esli, soon fon Nakay, ₂₆soon fon Maate, soon fon Matatias, soon fon Semey, soon fon Yoosef, soon fon Yotah, ₂₇soon fon Yoanan, soon fon Rësa, soon fon Soropapël, soon fon Salatiël, soon fon Nerii, ₂₈soon fon Mëlki, soon fon Ati, soon fon Kosan, soon fon Elmatan, soon fon Ër, ₂₉soon fon Yooxua, soon fon Eliëser, soon fon Yorim, soon fon Matat, soon fon Lewii, ₃₀soon fon Simeoon, soon fon Yutah, soon fon Yoosef, soon fon Yonan, soon fon Eliakim, ₃₁soon fon Meleah, soon fon Menah, soon fon Matatah, soon fon Natan, soon fon Dawii, ₃₂soon fon Yesë, soon fon Opëëte, soon fon Poas, soon fon Sala, soon fon Nasom, ₃₃soon fon Aminataap, soon fon Atmin, soon fon Arni, soon fon Ësrom, soon fon Përes, soon fon Yutah, ₃₄soon fon Yaakop, soon fon Iisak, soon fon Aapraham, soon fon Tëëra, soon fon Naoor, ₃₅soon fon Seruuk, soon fon Reuu, soon fon Peleek, soon fon Ëëper, soon fon Selah, ₃₆soon fon Kaynan, soon fon Arpaxaat, soon fon Sëm, soon fon Noee, soon fon Lamëk, ₃₇soon fon Matusalëm, soon fon Enok, soon fon Yarët, soon fon Maalalël, soon fon Kaynan, ₃₈soon fon Enoos, soon fon Sët, soon fon Aatam, soon fon Hërkot.