Pekriisung
1-2Ich, Phaulus, woo keruuf kep sin torich Hërkot sayne wile fer Yeesus Kristus sayne aphostel sin, xraywe, mit em pruuter Soostenes, tee priif fer Hërkot sayn khërich woo in te xtat Korinto is. Xraywe fer al tii woo, torich Yeesus Kristus, keruuf kep sin fer tsum Hërkot sayn folek keheere. Tee priif is aach fer tii woo, uf ale plets, unser Hër Yeesus Kristus aan peete, tëne iire Hër un unsere.
3Tas te knaate un te friite fon Hërkot, unser Fater, un fon Yeesus Kristus, mit aych sin!
Seechne torich Kristus
4Ich tanke imer fer mayne Hërkot weche te knaate woo eyer kep hot fer aych torich Yeesus Kristus. 5Wayl teyer fereenicht sayt mit Yeesus Kristus, sayt teyer raych kemach kep in ales, soo im knaate fer te ewankeelium aan saan wii im knaate fon te kaystlich wisheet. 6Ti mensaaj iwich Kristus is soo xtram in aych, 7tas teyer ti kanse kaystliche knaate kriit hot soo lang wii teyer am waarte sayt tas unser Hër Yeesus Kristus tsum foerxayn khomt. 8Kristus tuut aych xtram hale pis ans ën, soo tas, am taach woo unser Hër Yeesus Kristus khome tuut, teyer khee xult an niks hot. 9Hërkot is troy un hot aych keruuf tas teyer in eenichkheet leewe tuut mit sayne Soon Yeesus Kristus, unser Hër.
Xpalung in te khërich fon Korinto
10Priiter, ich ferlange, torich ti autoriteet fon unser Hër Yeesus Kristus, tas teyer eenich sayt in was teyer saan tuut un tas es khee xpalung unich aych kept. Halt aych in klayche ketanke un klayche sin. 11Wayl, mayn priiter, phaar layt fon Kloë sayn familye hon mich fertseelt tas xtrayt unich aych am paseere is. 12Was ich saan wil is tas yeete ëne fon aych etwas aneres am saan is. Ëne saat: “Ich keheere tsuu Phaulus”; anere saat: “Ich sin fon Apolo”; te anere saat: “Ich keheere tsu Pheeter”; un noch anere: “Ich sin fon Kristus”. 13Is filaycht Kristus in xtiker ferteelt kep? Meecht Phaulus am krayts kextorep sin weche aych? Ore meecht teyer ketaaft kep sin im naame fon Phaulus?
14Kot say tank tas ich khee ëne fon aych ketaaft hon, ploos Krispo un Kayo. 15Soo, khan nimant saan tas eyer in mayne naame ketaaft kep waar. 16(Ah! Yoo. Ich hon aach Stefanas un sayn familye ketaaft, awer khan mich net erinere an sonst nimant woo ich ketaaft hon.) 17Wayl Kristus hot mich net kexikt fer se taafe, awer fer te ewankeelium aan saan, un tas mache oone ti mënxlich wisheet penutse, fer net ti macht fon Kristus sayne toot am krayts wech hoole.
Kristus, ti macht un ti wisheet fon Hërkot
18In te woerheet, ti mensaaj fon Kristus sayne toot am krayts is en feriktichkheet fer tii woo sich am ferleere sin; awer fer uns, woo keret am kewe sin, is em Hërkot sayn macht. 19Wayl ti Hayliche Xrifte saan:
“Ich fermache te wisente sayn wisheet
un mache ën mit te kelërnte sayn khëntnise.”
20Tan, was khëne ti wisente un ti kelërnte saan? Was saan ti kroose xprecher fon tee welt? Hërkot hot ketsaycht tas ti wisheet fon tee welt feriktichkheet is.
21Wayl Hërkot, in sayn wisheet, net kelos hot tas ti mënxe iim khëne teere torich tëne sayn wisheet. Kraat es keeche teel, hot resolweyert se rete tii woo klaawe un hot tas kemach torich te mensaaj woo meyer aan saan, tii woo “ferikt” kenënt kept. 22Ti yute ferlange wunere als pewaysung, un tii woo khee yute sin suuche ti wisheet. 23Awer meyer saan te pekraytste Kristus aan, en mensaaj woo fer ti yute en xteen is woo se traan xtërtse un fer tii woo khee yute sin is es en feriktichkheet. 24Awer fer tii woo Hërkot keruuf hot, kraat soo ti yute wii tii woo khee yute sin, is Kristus Hërkot sayn macht un Hërkot sayn wisheet. 25Wayl tas woo feriktichkheet aus siit hot mee wisheet wii ti mënxlich wisheet, un tas woo aus siit wii Hërkot sayn xwachheet is xtërker wii ti mënxlich kraft.
26Yets, mayn priiter, tënkt traan an was teyer waart wii Hërkot aych keruuf hot. Wën mer tas aan kukt in te mënxlich aart, weenich fon aych waare wisente ore mechtich ore fon importante familye. 27Fer ti wisente ferxeeme, hot Hërkot aus kesuucht tas was ti welt tënkt weyer feriktichkheet; un, fer ti mechtiche ferxeeme, hot eyer aus kesuucht was ti welt xwach fint. 28Fer se fernichte was ti welt tënkt weyer important, hot Hërkot aus kesuucht tas was ti welt ap xtoost, keweenlich fint un saat het khee weyert. 29Tas mënt tas nimant khan hooch muutich kewe, wayl wees tas Hërkot ales am siin is. 30Awer, Hërkot hot aych fereenicht mit Yeesus Kristus un hot kemach tas Kristus unser wisheet sol sin. Un is torich Kristus woo meyer aan kenom kewe fon Hërkot, kewe em Hërkot sayn folek un kewe keret. 31Also, wii ti Hayliche Xrifte saan: “Weyer sich inpilte wil, sol sich inpiltee uf tas was Hërkot macht.”